2024ko abenduak 19
Bilboko Campusa
Deustuko Unibertsitateak Deustobarometro Sozialaren 15. edizioko emaitzak aurkeztu ditu abenduak 19. Sei hilean behin euskal gizartean kezka handiena pizten duten gaiei buruz herritarrek dituzten iritziak jasotzen dituen inkesta honen arabera, etxebizitza lortzea bihurtu da euskal herritarren arazo garrantzitsuena lehen aldiz, osasun arretarekin berdinduta (% 41).
Herritarren % 31k uste dute ezin izango dutela inoiz etxerik erosi, eta % 28k 10 urte baino gehiago beharko dituztela etxea erosteko. Jabetzaren kultura erabat errotuta dago Euskadin: % 91k nahiago dute jabetza alokairua baino, % 70ek uste dute alokatzea dirua botatzea dela, eta % 86k etxebizitza erostea dela inbertitzeko modurik onena. % 84ren ustez, hutsik dauden etxeak indarrez okupatzea ezin da inola ere justifikatu eta gehienek (% 60) babesten dute jabeei beren etxeak berreskuratzen laguntzeko indarkeria erabiltzen duten enpresak egotea.
Etxebizitzaren merkatuan esku hartzea
Herritar gehienek ikusten dute egoki estatuak etxebizitzaren merkatuan esku hartzea. Ondo iruditzen zaie eremu tentsionatuak izendatzea alokairuei mugak jartzeko (% 70), alokairuko etxebizitza sozialak eraikitzea (% 86), alokairuagatiko kenkariak handitzea (% 76) eta udalei lurzoru gehiago liberatzeko aukera ematea etxebizitza librearen eskaintza handitzeko (% 75). Gehienek (% 76) muga bat ezarriko lukete inork 2 etxebizitza baino gehiago jabetzan izan ez ditzan.
Etxebizitzaren arazoaren erantzukizunari dagokionez, herritar gehienek hainbat eragile eta erakunderen artean banatzen dute. Garrantzizkoenak hauek lirateke: inbertsio-fondoak (7,9), Gobernu zentrala (7,6), jabe handiak (7,5), Eusko Jaurlaritza (7,5) eta udalak (7,3).
Datu gehiago: Osakidetzak hobetu du balorazioan (4,4tik 5era) eta herritarren konfiantzan (5,2tik 5,8ra) azken sei hilabeteetan. EAEko herritarren % 84k uste dute klima aldaketak eragina izan zuela Valentzian 200 hildako baino gehiago eragin zituen goi-geruzetako depresio isolatuan. Klima larrialdiagatiko kezkak gora egin du eta langabeziagatikoa gainditu du. Euskal herritarrik gehienek (% 64) uste dute Eusko Jaurlaritza berriak gutxi edo ezer ez dituela aldatu azken urteotako politikak.
2024ko neguko Deustobarometroaren aurkezpena
